Raibeart Dunbar

Tha Raibeart Dunbar na Àrd-Ollamh Rannsachaidh aig Sabhal Mòr Ostaig/OGE, far a bheil e na stiùiriche air 'Soillse', pròiseact rannsachaidh luach £5.29 millean thairis air 5 bliadhna a sgrùdas suidheachadh na Gàidhlig san latha an-diugh agus poileasaidhean airson na Gàidhlig. Tha e cuideachd na bhall de Bhòrd na Gàidhlig, agus bha e roimhe na Stiùiriche air Comunn na Gàidhlig agus na Chathraiche air a’ bhuidheann-obrach airson inbhe laghail don Ghàidhlig. Mar sin, chuidich e ann a bhith a’ dreachdadh molaidhean ChNAG airson Achd Ghàidhlig. Tha na cuspairean-rannsachaidh aige a' gabhail a-steach còirichean agus siostaman dìona laghail do mhion-shluagh agus do mhion-chànanan, poileasaidh-cànain, agus planadh-cànain airson mhion-chanan, agus tha an t-eòlas aige air na cuspairean seo aithnichte aig ìre eadar-nàiseanta. Tha Rob na Eòlaiche de Chomhairle na h-Eòrpa, agus bidh e ag obair gu tric còmhla ri Rùnachas Càirt Eòrpach nam Mion-chànanan agus nan Cànanan Roinneil. Tha e cuideachd na Àrd-phàirtiche Rannsachaidh Neo-chòmhnaidheach den Ionad Eòrpach airson Mion-chùisean (ECMI), ann am Flensburg, sa Ghearmailt. Tha e air comhairle a thoirt do riaghaltasan, buidhnean còraichean daonna, agus buidhnean neo-riaghaltais ann an grunn dhùthchannan air cùisean cànain agus còraichean daonna. ’S ann à Canada a tha Rob, agus choisinn e LL.B. bho Sgoil Lagha Osgoode Hall, Oilthigh York an Canada, agus thug e grunn bhliadhnaichean ag obair ann an Toronto aig Fasken Martineau, aon de na prìomh chompanaidhean lagha ann an Canada, mus an tug e a-mach LL.M aig Sgoil Eaconamachd Lunnainn, agus dreuchdan acadamaigeach ann an lagh aig Oilthigh Ghlaschu agus an uair sin aig Oilthigh Obar Dheathain. Tha Rob cuideachd air Ph.D. a choisinn aig Oilthigh Dhùn Èideann, air beatha agus obair Iain MhicGilleain, ‘Bàrd Thighearna Chola’ (1787-1848), bàrd ainmeil Thiriodh agus Alba Nuaidh. Gabhaidh a chuid rannsachaidh a-steach litreachas agus cultar na Gàidhlig, agus gu sònraichte dualchas Gàidhlig Chanada, agus tha e ag obair an-dràsta air deasachadh sgoilearail de bhàrdachd shaoghalta Iain MhicGilleain cho math ri leabhar air beatha agus obair a’ bhàird sin.

Còd Giùlain nam Ball