Naidheachdan > 2008

Gairm mu dheireadh FILMG airson fhilmichean

Às deidh sia mìosan glè bhrosnachail tha FilmG, a’ chiad cho-fharpais fhilmichean goirid aig MG ALBA, a’ tarraing gu crìch. Bidh a’ cho-fharpais, a ghlèidh taic bho ghrunn daoine iomraiteach a’ gabhail a-steach stiùiriche a choisinn BAFTA Don Coutts, sgrìobhadair dhealbhan-cluich is sgriobtaichean Iain Fionnlagh MacLeòid agus an neach-camara dàna Keith Partridge (Touching the Void), a’ dùnadh airson inntrigidhean 1d an Dùbhlachd.

FilmG

Le maoin duaisean luach £35,000 gu lèir agus fosglaidhean air leth airson am film a bhith air a leasachadh airson craoladh le MG ALBA air an t-sianal ùr Ghàidhlig BBC ALBA, ’s e fìor chothrom a tha seo do luchd-dèanamh fhilmichean ùra gus an cuid tàlainn a thaisbeanadh. Tha fhathast beagan sheachdainean ri dhol gu ruige ceann-là an dùnaidh mar sin tha sgioba FilmG a’ cur ìmpidh air duine sam bith aig a bheil ùidh ann am filmichean an obair aca fhèin a chur a-steach cho sgiobalta ’s urrainn dhaibh. A’ bruidhinn air a’ cho-fharpais, thuirt rionnag Still Game, Greg Hemphill, “tha film goirid na fhìor dheagh cheum gu ruige cosnadh ann an gnìomhachas nam filmichean agus feumar a bhrosnachadh an-còmhnaidh”.

Tha e comasach do dhaoine coimhead air agus bhòtadh airson an fhilm as fheàrr leotha air-loidhne aig www.filmg.co.uk bho 8mh an Dùbhlachd. Bidh duais shònraichte ‘Roghainn an t-Sluaigh’ air a buileachadh air an fhilm leis an àireamh as àirde de bhòtaichean.

Thèid na filmichean air a’ gheàrr-liosta a shealltainn aig oidhche mhòr nan duaisean ann an Taigh-cluiche Eden Court, Inbhir Nis, Dihaoine 6mh an Gearran 2009. Le ceòl beò agus preasantairean sònraichte air aoigheachd, bu chòir dhi bhith na h-oidhche mhìorbhaileach dhaibhsan a bhios ann.

Bidh an tuilleadh fiosrachaidh air na duaisean ri fhaotainn a dh’aithghearr air làrach-lìn FilmG.

Agus airson taic no comhairle anmoch cuir fios gu Flòraidh no Michelle, fios@filmg.co.uk no fòn (0)1471 888 500.