Naidheachdan > 2009

16/07/09

MG ALBA - A’ LEASACHADH TÀLANT GÀIDHLIG

THA MG ALBA AIR CÒIG ÀITEACHAN A GHLEIDHEADH DO CHLEASAICHEAN GÀIDHLIG AIG AN ACTORS CUT CHLIÙITEACH - GLASCHU

’S e buidheann-obrach chliùiteach do chleasaichean stèidhte a tha san Actors Cut a mhaireas fad seachdain agus a ghabhas àite aig stiùidiothan a’ BhBC ann am Pacific Quay, Glaschu bhon 24 – 28 Lùnastal 2009.

Tha MG ALBA, Seirbheis nam Meadhanan Gàidhlig, air còig àiteachan a ghleidheadh do chleasaichean Gàidhlig agus tha iad a’ toirt cuireadh do chleasaichean stèidhte neo proifeiseanta cur a-steach air a shon, is iad a’ tabhann cothrom gun choimeas ionnsachadh bhon fheadhainn as fheàrr sa ghnìomhachas agus a’ cleachadh an uidheim HD as ùire a th’ ann.
Bidh an Actors Cut a’ samhlachadh fìor shuidheachadh filmidh, le teicneolas HD, agus deichnear de sgioba proifeiseanta, a’ gabhail a-steach sàr stiùiriche togail-dhealbh, a bharrachd air maise-gnùis, seataichean, culaidhean, agus leantainneachd air sgàilein.
Tha Dame Judi Dench na neach-taic air an Actors Cut agus tha i a’ làn-chreidsinn gu bheil e na “Dhòigh iongantach air Ionnsachadh”.

Rè na greis ionnsachaidh bidh caochladh ceannardan nam bùithtean-obrach os cionn gach seisein – am measg cheannardan a tha air an dearbhadh (ma tha iad rim faighinn) tha:

• Dame Judi Dench, Sir Michael Gambon, Simon Callow, Tom Conti, Jonathan Pryce, Rufus Sewell, Owen Teale, Ray Winstone (uile nam pàtranan de Actors Cut) a thuilleadh air Frances Barber, Morag Fullarton, Kenneth Glennan, Rutger Hauer, David Hayman, Davy McKay, Alex Norton agus Bill Paterson.

Gheibhear barrachd fiosrachaidh air an Actors Cut air-loidhne

Thoir an aire gu bheil fàilte air tagraichean Gàidhlig cur a-steach airson an Actors Cut fiù ’s mura bi iad a’ cur tagradh airson goistidheachd MG ALBA no mura faigh iad aon dhe na còig àiteachan Gàidhlig a tha MG ALBA a’ tabhann.

Airson faighinn a-mach mu na còig greisean-ionnsachaidh pàighte le MG ALBA, cuir fios gu Katie NicLeòid aig MG ALBA air 0141 301 1774 no tro phost-d katie.macleod@mgalba.com