Naidheachdan > 2009

11 Màrt 2009

“MA BHÀSAICHEAS TU, ABAIR BÀS!” – BEACHD SIR JACKIE STIÙBHART AIR CÀRAICHEAN

CUIDE RI CATHY – SIR JACKIE STIÙBHART

Sir Jackie Stewart

A’ bruidhinn air prògram Cuide ri Cathy airson BBC ALBA, tha Sir Jackie Stiùbhart, a bhuannaich Farpais na Cruinne Formula 1 trì turas, ag innis gur e an latha mu dheireadh aige draibheadh anns an fharpais an latha as muladaiche aige na bheatha ann an spòrs.

Anns a’ phrògram, tha Sir Jackie cuideachd a’ bruidhinn air cuspairean mar na h-Olympics, creideamh, spòrs gunna agus na trioblaidean a tha aige le dyslexia. Tha Sir Jackie cuideachd a’ toirt sealladh air a’ bheatha phearsanta aige, a bhean Helen agus an teaghlach.

Chuir Cathy NicDhòmhnaill seachad latha còmhla ri Sir Jackie airson na sreath phrògraman a tha a’ dol a-mach air BBC ALBA. Còmhla ri Sir Jackie, chaidh i gu Colaiste Phoileis na h-Alba ann an Tullieallan, far an robh e a’ bruidhinn air dyslexia.

Tha Sir Jackie na Cheann-suidhe air a’ bhuidhinn Dyslexia na h-Alba agus dh’innis e do Chathy mu dheidhinn an latha a fhuair e a-mach gun robh duilgheadas aige. Chan urrainn dha litrichean aibidil innis no facail laoidh na Rìoghachd Aonaichte ainmeachadh, ged a bhios e tric na sheasamh faisg air a’ Bhànrigh.

Ged nach bi e tric a’ frithealadh eaglais sam bith, tha Sir Jackie ag innis anns a’ phrògram gu bheil e ag ùrnaigh agus a’ toirt taing airson na tha aige.

Thèid Cuide ri Cathy còmhla ri Sir Jackie Stiùbhart a chraoladh air BBC ALBA Diluain 16mh Màrt aig 22.00. Gheibhear BBC ALBA air Sky 168 agus air Freesat 110.