Naidheachdan > 2010

5 Iuchar 2010

MG ALBA A’ CUR FÀILTE AIR TAIC COMHAIRLE LUCHD-AMHAIRC A’ BHBC AIRSON FREEVIEW

Tha MG ALBA (Seirbheis nam Meadhanan Gàidhlig), an-diugh a’ cur fàilte air taic ùr airson sgaoileadh BBC ALBA air Freeview.

Tha Comhairle Luchd-amhairc a’ BhBC airson na h-Alba air beachd soilleir a chur an cèill ann an Aithisg Bhliadhnail a’ BhBC ann an Alba gun tigeadh àrdachadh susbainteach sna h-àireamhan aig am biodh cothrom BBC ALBA fhaicinn an lùib sgaoileadh an t-seanail air Freeview.

Tha a’ Chomhairle Luchd-amhairc cuideachd air a ràdh gun robh BBC ALBA air sealltainn gun robh e tarraingeach do mhòr-shluagh na h-Alba, a bharrachd air luchd-labhairt na Gàidhlig – ged nach eil ach 40% de dhaoine ann an Alba a’ faighinn an t-seanail aig an àm seo.

Thuirt Alasdair Moireasdan, cathraiche MG ALBA – a tha a’ ruith BBC ALBA ann an co-bhanntachd leis a’ BhBC – “Tha Comhairle Luchd-Amhairc na h-Alba ceart a bhith a’ comharrachadh nam buannachdan mòra airson luchd-amhairc ann an Alba ma tha BBC ALBA ri fhaighinn air Freeview.

“Tha sinn toilichte cuideachd gu bheil a’ chomhairle air aithneachadh gu bheil BBC ALBA glè tarraingeach do luchd-amhairc farsaing ann an Alba, gu tric nas farsainge na seirbheisean eile a’ BhBC. Tha sinn an dòchas gum bi Urras a’ BhBC a’ toirt fa-near beachdan na comhairle ann an bhith a’ tighinn gu co-dhùnadh air Freeview am bliadhna.”

Tha àireamhan luchd-amhairc airson BBC ALBA air a bhith rèidh, le daoine a’ coimhead an t-seanail airson ùine nas fhaide. Is e an àireamh mheadhanach airson ruigse sam bith 220,000 duine gach seachdain, agus aig amannan tha an àireamh air a bhith nas àirde na cairteal a’ mhillean. Bha ruigse nas fhaide na 15 mionaid air feadh na h-Alba aig àireamh mheadhanach 180,000 san t-seachdain sna 12 mìosan gu 31 Màrt 2010.

Thuirt Mgr Moireasdan: “Tha àireamhan an luchd-amhairc glè chreideasach agus tha iad math an coimeas leis na h-àireamhan airson sheanailean didseatach eile ann an Alba. Tha na h-àireamhan air a bhith làidir, agus feumar a chuimhneachadh gu bheil na h-àireamhan airson na bliadhna uiridh cuideachd a’ toirt a-steach nan àireamhan àrda a bha a’ coimhead BBC ALBA air a’ chiad chraoladh, a bha cuideachd air BBC2.

“B’ urrainn dhuinn tòrr a bharrachd a dhèanamh a thaobh àireamhan luchd-amhairc nan robh BBC ALBA air Freeview. Ma ghabhas sin a dhèanamh, bidh àrdachadh mòr san àireamh a tha a’ gabhail tlachd ann an seanail a tha a’ craoladh fìor dheagh phrògraman Albannach.”