Naidheachdan > 2010

13 Dàmhair 2010

TAIC BHO MG ALBA AIRSON TÀLANT ÙR SNA MEADHANAN

Tha MG ALBA a’ brosnachadh tàlant ùr sna gnìomhachasan film agus telebhisein leis a’ chiad thaisbeanadh an-diugh (Diciadain) den fhilm ùr ‘An Seòladh’ aig a’ Mhòd Nàiseanta Rìoghail ann an Gallaibh.

Is ann tron fharpais FilmG a fhuaireas lorg air tàlant an sgrìobhaiche-stiùiriche, Seònaid Dhòmhnallaich, a tha a’ fuireach ann an Inbhir Nis.

Seònaid Dhòmhnallach

Tha Seònaid air ‘An Seòladh’, film 10-mionaidean, a sgrìobhadh agus a stiùireadh le taic bho MG ALBA, às dèidh dhi duais ‘Film as Fheàrr’ le filmeadair ùr a ghleidheadh sa chiad fharpais FilmG a’ bhon-uiridh le a film ‘Oidhche Shathairne’.

Chaidh ‘An Seòladh’, mu dheidhinn tè òg a’ tilleadh a Leòdhas a dh’fhuireach còmhla ri a pàrantan, a chlàradh as t-samhradh am bliadhna air bòrd bàt’-aiseig Chalmac, MV Isle of Lewis, agus thèid am film a chur a-steach airson fharpaisean film san dùthaich seo agus thall thairis.

Agus le taic-airgead MG ALBA, tha Seònaid cuideachd a’ toirt ceum air adhart leis a cuid-sgrìobhaidhean, mar tè den dithis Ghaidheal air cùrsa ùr MA aig Oilthigh Caledonian Ghlaschu ann an sgrìobhadh airson telebhisean.

Tha Seònaid den bharail gun do dh’atharraich FilmG slighe a beatha. “Chan eil teagamh sam bith agam ach gu bheil mo bheatha gu tur eadar-dhealaichte bhon a fhuair mi an duais sa chiad fharpais FilmG,” tha i ag ràdh. “Mura robh mi an sàs ann, cha bhiodh misneachd gu leòr agam airson an ceum seo a ghabhail. Ma tha duine sam bith eile a’ smaoineachadh mu dheidhinn film a chur a-steach airson FilmG am bliadhna, bhithinn gam brosnachadh gus sin a dhèanamh.”

Tha Seònaid air a bhith ag obair còmhla ri riochdaire Amanda Millen, a tha cuideachd na stiùiriche air Screen HI, a tha fo chùmhnant le Iomairt na Gaidhealtachd agus nan Eileanan. Tha Amanda, a b’ àbhaist a bhith ag obair aig a’ BhBC, ag ràdh: “Sa chiad dà bhliadhna thàinig tòrr dhaoine tro na farpaisean FilmG aig an robh tàlant sònraichte, gu h-àraid air a’ Ghaidhealtachd agus sna h-Eileanan. Tha Screen HI agus HIE toilichte a bhith ag obair còmhla ri MG ALBA agus FilmG, a’ brosnachadh tàlant ùr agus a’ toirt dhaoine air adhart dhan ath cheum sa ghnìomhachas chraolaidh phroifeiseanta. Bha e na thoileachas mòr dhomh a bhith an sàs anns a’ chiad fhilm phroifeiseanta a rinn Seònaid. Tha FilmG a’ fàs nas fheàrr a h-uile bliadhna ’s tha an fharpais a-nis air a stèidheachadh mar thachartas film sònraichte, agus tha mi a’ coimhead le fiughair ris na filmeadairean ùra a bhios an sàs anns an fharpais am bliadhna.”

Thuirt Dòmhnall Caimbeul, Àrd Oifigear MG ALBA: “Tha FilmG ag amas air tàlant ùr a lorg agus a bhrosnachadh, ach chan eil ann ach a’ chiad cheum. Tha an cùrsa MA aig Caledonian, agus na h-iomairtean trèanaidh eile dha bheil sinn a’ cumail taic, a’ toirt cothrom do sgrìobhadairean agus filmeadairean ùra eòlas a chur air a’ ghnìomhachas agus tha iad a’ cur ris an àireamh de dhaoine tàlantach a tha a dhìth airson filmichean agus prògraman Gàidhlig a dhèanamh. Tha e mar rùn daingeann aig MG ALBA a bhith a’ cur air dòigh chothroman trèanaidh airson luchd-obrach nam meadhanan Gàidhlig, agus tha sinn air leth toilichte a bhith an sàs ann am pròiseactan mar seo le filmeadairean soirbheachail.”

Is e FilmG an fharpais a th’ aig MG ALBA airson fhilmichean goirid, a-nis ga ruith airson na treas bliadhna. Tha e fosgailte do dhuine sam bith thairis air aois 12 film a dhèanamh sa Ghàidhlig eadar trì agus còig mionaidean a dh’fhaide. Gheibhear tuilleadh fiosrachaidh aig www.filmg.co.uk.