Naidheachdan > 2010

14 Dùbhlachd 2010

BILL PATERSON AGUS AN GRUFFALO A’ TIGHINN GU BBC ALBA

Tha BBC ALBA gu bhith a’ craoladh an dealbh-beò ainmeil An Gruffalo air 24 Dùbhlachd aig 6f. Tha am prògram stèidhichte air an leabhar aig Julia Donaldson, a tha air iomadh duais a chosnadh airson a cuid leabhraichean agus tha BBC ALBA air leth toilichte a bhith a’ co-obrachadh leatha. ’S e an cleasaiche cliùteach Bill Paterson a tha ag aithris guth a’ Ghruffalo agus e air Gàidhlig ionnsachadh gu sònraichte airson seo a dhèanamh.

Bill Paterson & The Gruffalo

’S i Cathy Dhòmhnallach riochdaire a’ phrògraim agus ’s i a thug taic dha Bill Paterson le a chuid Ghàidhlig ionnsachadh.

Thuirt Neach Deasachaidh BBC ALBA, Mairead Chamshron: “Mar a bhios fios aig a’ mhòr-chuid, tha An Gruffalo air a bhith cho soirbheachail mar phrògram agus tha e a’ toirt toileachas dhuinn gun urrainnear a thoirt gu luchd-amhairc BBC ALBA. Le guthan bho Bill Paterson agus Tonaidh Kearney, tha sinn deimhinne gun còrd e ris an teaghlach air fad aig an àm sònraichte seo den bhliadhna”.

Tha Bill Paterson fhèin ag ràdh: “Gu fortanach aig a’ mhionaid mu dheireadh fhuair mi a-mach gur ann à àite faisg air Àird Rosain a bha An Gruffalo agus gu robh Gàidhlig annasach aige! Mar sin, tha mi ann an cuideachd mhath!”

Chithear An Gruffalo air BBC ALBA air Dihaoine 24 Dùbhlachd aig 6f, le ath-chraoladh air Là na Nollaig aig 5f agus Diluain 27mh aig 4.15f.