7 Samhain 2008
BOROUGHMUIR V STIRLING COUNTY – BEÒ AIR TBH
Gheibh luchd-leantainn rugbaidh air feadh Alba cothrom gèam Didòmhnaich eadar Boroughmuir is Stirling County fhaicinn beò air an t-sianal ùr telebhisein BBC ALBA.
Thèid an gèam eadar sgiobaidhean na Prìomh Roinne, Boroughmuir agus Stirling County, a chraoladh beò bho Meggetland (a’ tòiseachadh aig 3f).
Bidh agallamh sònraichte sa prògram le Chris Paterson a thuilleadh air aithris mun fharpais leantainneach as aosta ann an eachdraidh rugbaidh an t-saoghail, a chaidh a chluich an toiseach ann 1858 eadar Sgoil Caisteal Mherchiston agus sgoilearan bho Acadamaidh Dhùn Èidinn. Bidh agallamhan beò bhon dà sgioba an dèidh nan geamannan air an telebisean cuideachd.
‘S i seirbheis compàirteachaidh, eadar MG ALBA agus BBC Alba a th’ ann am BBC ALBA. Tha sàr phasgan spòrs an t-sianail ga thabhann ann an co-bhoinn le MNE Media.
Thuirt Alan Esslemont, Ceannard Phrògraman aig BBC ALBA: “Tha tabhann gèam Phrìomh-fharpais Roinn a h-Aon beò air an telebhisean na fhìor bhrosnachadh dha luchd-leantainn ionadail as urrainn a-nis coimhead air mar a bhios e a’ tachairt, agus dha luchd-leantainn rugbaidh cluba air feadh Alba.
"Bha na ciad gheamaichean beò air an telebhisean air an dearbhadh taitneach gu mòr dha luchd-amhairc agus tha mi a’ dèanamh fiughair ri bhith a’ lìbhrigeadh pasgan farsaing rugbaidh air an TBh tron t-seusan air fad. Bha fadachd oirnn gus am biodh craodhladh beò rugbaidh cluba ann agus tha mi toilichte da-rìribh gu bheil BBC ALBA a’ tabhann na seirbheis mhiannaichte seo."
Thuirt Àrd-oifigear Rugbaidh na h-Alba Gordon McKie: "Tha sinn ro thoilichte gu bheil BBC ALBA cho brosnachail ann a bhith ag obair còmhla rinn gus cliù ar gèama àrdachadh."
Thuirt neach-trèanaidh Bhoroughmuir, Eamon John: "Saoilidh mise gu bheil craoladh a’ ghèama math dha-rìribh dha na clubaichean agus dha na cluicheadairean. Tha e sgoinneil gun urrainn do dhaoine rugbaidh cluba fhaicinn air an telebhisean agus ’s e leasachadh a tha seo don ghèama chluba an Alba air a bheil sinn a’ cur fàilte."
Thèid gèam Didòmhnaich a chraoladh beò air BBC ALBA bho 3f – 5f agus chìthear e air sianal 168 Sky agus air sianal 110 Freesat.
Airson fiosrachadh a bharrachd cuiribh fios gu Ramsay Mac a’ Ghobhainn no Lorna Inglis aig Media House air 0141 220 6040 no post-d gu: ramsay@mediahouse.co.uk / lorna@mediahouse.co.uk
Fios do luchd-deasachaidh:
Dh’fhoillsich BBC ALBA fiosrachadh luchd-amhairc an-diugh airson a’ chiad turais a-riamh. ’S urrainnear na toraidhean a leughadh aig www.bbc.co.uk/pressoffice
’S e seirbheis ùr dhidseatach Ghàidhlig a tha ann am BBC ALBA a chuireadh air bhog 19 an t-Sultain agus a tha na co-bhann eadar MG ALBA agus am BBC.
Gheibhear e air sianal 168 Sky agus air Freesat sianal 110. Thathas an dùil gum bi BBC ALBA ri fhaighinn air càball ann an ceann ùine. An urra ri sgrùdadh le Urras a’ BhBC, bidh BBC ALBA ri fhaighinn air Freeview nuair a thèid atharrachadh gu seirbheis didseatach ann an 2010. Airson tuilleadh fiosrachaidh mu ruigsinneachd BBC ALBA rachaibh gu ar làrach-lìn: www.bbcalba.co.uk.
Tha MG ALBA agus am BBC air co-bhann a stèidheachadh airson seirbheisean telebhisein didseatach, rèidio agus air-loidhne a lìbhrigeadh sa Ghàidhlig. Bithear a’ craoladh seirbheis BBC ALBA fo chead BBC. Gus tuilleadh fhaighinn a-mach mu obair a’ chom-pàirteachais rachaibh gu www.mgalba.com.
‘S e MG ALBA ainm obrach Seirbheis nam Meadhanan Gàidhlig, a tha maoinichte le Riaghaltas na h-Alba agus fo riaghladh Ofcom. Tha an t-ainm MG ALBA a’ seasamh airson Meadhanan Gàidhlig Alba.