Soillse: A’ Tairgse Eilean
Diciadain 20mh Iuchar aig 9.00f air BBC ALBA
Air feadh an t-saoghail, tha ceudan de dh’ eileanan air an ceannachd ‘s air an reic a h-uile bliadhna, bho ‘atolls’ anns A’ Chuan Shèimh gu sgeirean faisg air A’ Bhreatainn Bhig. Às dèidh mòran ùidh ann an Eilean Tharasaigh anns Na Hearadh a chaidh a reic bho chionn ghoirid, tha Soillse air BBC Alba a’ toirt boillsgeadh fiosrachail dhuinn do feadhainn de na cothroman agus na mì-chothroman an lùib a bhith a’ tairgse eilean.
Smaoinich air eilean làn ciùineas, nàdar agus ùine gu leòr airson tlachd a ghabhail às. Smaoinich air do bheatha air eilean nad aonar, air falbh bho uallach agus onghail nam bailtean mòra.
Seo an seòrsa beatha a tha a’ còrdadh ri Tevo air an ‘atoll’ aige a tha suidhichte pìos air falbh bho Bora Bora anns A’ Chuan Shèimh. Fhuair e an t-eilean bho athair agus airson iomadh bliadhna tha e air a bhith taingeil mun cheangal làidir a th’ aige le nàdar agus le na tha timcheall air.
Gu mì-fhortanach chan eil e furasta a bhith leat fhèin. “Tha dòigh beatha air an iomall airson a’ mhòr chuid mu dheidhinn miann a bhith nad aonar. Mar sin tha agad ri bhith a’ cumail sùil a-mach air do shon fhèin” mhìnich Tevo. Mar as tric, tha rud sìmplidh mar turas do na bùithtean a’ toirt an àrd an dàrna leth den là agus tha seo ga dhèanamh doirbh dha. Cuideachd tha dìth uisge airson òl air an eilean agus tha an dealan aige a’ tighinn à pannalan grèine, tha seo a’ ciallachadh gu bheil e an urra ris an aimsir. Tha Tevo den bheachd gum bu chòir dha rudeigin ùr a dhèanamh, agus tha e a-nis an dùil an t-eilean a reic.
Fhad ‘s a tha sinn a’ leantainn nan sgeulachdan an cois nan eileanan maiseach a tha rin reic air feadh an t-saoghail, tha an neach-reic taighean Jaques ag innse feallsanachd chudthromach dhuinn agus a’ faighneachd “An e beatha ann an suidheachadh fiadhaich an dòigh-beatha as fheàrr?”
Ach eadhon ann am pàrras ‘s urrainn dha cùisean a dhol ceàrr. Ma tha cuairt-gaoithe ann mar eisimpleir ‘s urrainn do aisling a dhol na dhroch bhruadair ’s a’ bhad, mar a thachair do Stan air an eilean aige nuair a bhual Cuairt-Gaoithe Oli air Polynesia, a’ dèanamh milleadh air an taigh aige agus a h-uile càil a bha na slighe. Bha seo mar dhearbhadh do Stan gum bu chòir dha an t-eilean a reic. Mar as tric le na h-eileanan a tha seo, tha thu nas buailteach airgead a chall agus gu h-àraidh às dèidh aimsir den t-seòrsa sin tha bargan no dhà rim faighinn ma tha thu airson eilean a cheannachd anns an àite. Tha Stan a’ comhairleachadh ge-tà “Chan e bargan a th’ ann, ‘s e dòigh-beatha a th’ ann… Ma tha thu a’ coimhead airson bargan na ceannaich motu idir” ach eadhon le cuairtean-gaoithe, tha eilean prìobhaideach anns Na Tropaigean gu math tlachdmhor.
Tha e gu math furasta dhuinn sinn fhèin a chall ann am bòidhchead, eachdraidh agus làraich sònraichte nan eileanan àlainn a tha seo, ach le barrachd riaghailtean-fearainn agus iarrtas airson ‘pìos de phàrras’, tha Soillse aig BBC Alba a’ toirt cothrom dhuinn ar n-òrdagan a bhogadh dhan uisge a tha a’ cuairteachadh nan eileanan a tha rin ceannachd air feadh an t-saoghail, a dh’ fhaicinn a bheil am pàrras airidh air a’ phrìs.