MADAME ECOSSE AIR BBC ALBA
Diluain 13 Giblean, 9f, BBC ALBA
“Stop the world, Scotland wants to get on” - sin na briathran a bh’aig Winnie Ewing air an 2mh den t-Samhainn 1967 nuair a bhuannaich i ann am fo-thaghadh eachdraidheal as leth Pàrtaidh Nàiseanta na h-Alba ann am baile Hamilton. Spìon i leatha tè dhe na roinnean-taghaidh a bu shàbhailte a bh’ aig na Làbaraich ann an Alba, agus dh’atharraich i gu tur cruth poileataigeach na tìre. Tharraing i Nàiseantaich Alba bhon iomall gu deis-mheadhain na deasbaid, agus chuir i às don chruth dà-phàrtaidh a bh’ air an dùthaich.. Bha na briathran aice lèirsinneach, ‘s cha b’ ann a-mhàin do dh’Alba. Mar bhoireannach ann am poileataigs Albannach, bha i a’ sireadh dòigh r air nithean a choileanadh.
‘S i nise gus a bhith 80 bliadhna a dh’aois, chan eil mùthchadh air a driùdhteachd agus tha i cho geur ‘s a bha i riamh. Le iomraidhean is beachdan bho Alex Salmond, Ian Paisley, Tam Dalyell, Mìcheal Russell is Brian MacUilleam, Aonghas Brianan MacNèill, Alasdair Ailean agus Fergus Ewing, tha a’ fiolm a’ toirt cùnntas air a beatha ‘s a h-obair a tha an dà chuid dlùth agus cruaidh. Tha am film cuideachd a’ toirt iomradh air àm anns an do dh’atharraich beatha Winnie agus an dùthaich aice gu tur.
Winnie Ewing
Tha i air 50 bliadhna dhe beatha a chur seachad ann an trì Pàrlamaidean – Westminster, san Roinn Eòrpa far an do choisinn i am far-ainm Madame Ecosse, agus Pàrlamaid na h-Alba. Am beachd chuid,‘s e bana-ghaisgeach Nàiseantach a tha ann a Winnie; tha gràdh aig cuid oirre agus gràinn aig cuid eile. Ach ciamar a dh’èirich an tè-lagh seo gu ìnbhe cho uasal ann am poileataigs na h-Alba,‘s gu bheil sinn fhathast mothachail air a bhuaidh a’ choisinn i ann an Hamilton.
Aig cridhe a’ phrògram aithriseach seo, tha còmhraidhean le Winnie fhèin, agus còmhla ris a sin tha dealbhan-bhideo a chaidh a thogail ro thaghadh Hamilton agus dealbhan teaghlaich nach fhaca am pobull riamh ron a seo.
Riochdaichte le madmac airson BBC ALBA, chaidh Madame Ecosse a riochdachadh le Mòrag Stiùbhart agus Iseabail NicÌomhair, agus a stiùireadh le Iseabail NicÌomhair. Chi sibh seo aig 9f, Diluain 13 Giblean air BBC ALBA, Sky channel 168 agus Freesat channel 110.