Air Ais
Tasglann Litrichean Naidheachd
Iuchar 2010
A chàirdean,
A dh’aindheoin mar a ghlac Wimbledon agus Cupa na Cruinne aire dhaoine, ghlèidh BBC ALBA an luchd-amhairc tro thoiseach an t-samhraidh, rud a tha gu math taitneach innse aig aon de na h-amannan is farpaisich den bhliadhna.
Mar a tha fhios agaibh ’s e ar ceann uidhe gun tèid aig a h-uile duine ann an Alba BBC ALBA fhaighinn. Tha an tionndadh gu didseatach a’ leantainn, agus bho dheireadh an Iuchair cha bhith craoladh telebhisein analog air a’ Ghaidhealtachd agus na h-Eileanan tuilleadh.
As t-fhoghar gheibh sinn a-mach a bheil Urras a’ BhBC dèonach an t-seanail a chur air Freeview mar a tha sinne agus oifigearan a’ BhBC a’ moladh. Tha sinn an dòchas cuideachd gum bi am BBC air fuasgladh fhaighinn air an duilgheadas a bha a’ cumail BBC ALBA far cabal. Tha an t-seanail air dearbhadh gu bheil e airidh air a bhith mar roghainn airson gach neach-coimhid telebhisean an Alba, agus tha sinn dòchasach – ged a tha na h-uiread de dh’iomairt fhathast a dhìth – gur ann mar sinn a bhitheas ro dheireadh na bliadhna.
Anns an eadar-ama, ma tha sibh a’ ceannach uidheamachd didseatach ùr, cuimhnichibh gu bheil BBC ALBA ri fhaighinn air saideil a-mhàin aig an ìre-sa – air Sky 168 agus Freesat 110.
Leughaibh barrachd san litir seo mun tionndadh agus mun sgeama chuideachaidh aig Digital UK.
Tha sinn an dòchas gu bheil prògraman BBC ALBA a’ còrdadh ribh. Gheibhear na naidheachdan as ùire aig www.mgalba.com.
Le gach dùrachd,
Dòmhnall Caimbeul
Àrd Oifigear
Ceòl, càraichean agus Cathy
Am measg nam prògraman sònraichte a bhios air BBC ALBA sna seachdainean a tha romhainn bidh:
Bidh gu leòr eile againn tron t-samhradh cuideachd. Cùm sùil air www.mgalba.com agus www.bbcalba.co.uk airson nan naidheachdan as ùire.
Agus bidh an ceòl a’ leantainn as t-fhoghar, le Piping Live, am Mòd Nàiseanta Rìoghail, Fèis Blas agus Duaisean MG ALBA “Na Trads”. Bidh sinn a’ sgaoileadh naidheachdan mu dheidhinn seo aig deireadh an t-samhraidh.
Lìog Magners a’ tighinn gu BBC ALBA
Tha MG ALBA air cùmhnant ceithir bliadhna aontachadh airson rugbaidh Lìog Magners a chraoladh beò, a’ tòiseachadh leis an t-sèasan 2010-11. Bidh geamannan beò le Glaschu agus Warriors Dhùn Èideann aig an taigh, agus roghainn de na geamannan eile a thathas a’ cluich air falbh.
Camanachd
Tha balaich an iomain trang am mìos seo. Chaidh cuairtean deireannach Cupan Comann Ceilteach Ghlaschu agus Marine Harvest Premier 6’s a chraoladh air BBC ALBA, agus bidh cuairt dheireannach Cupan a’ Bhaile Mhòir ga chraoladh beò Disathairne 17 Iuchar 2010, agus cuairt dheireannach Cupan Chataibh beò air Disathairne 31 Iuchar 2010 cuideachd. Gheibhear clàr-ama agus am fiosrachadh as ùire aig www.mgalba.com.
Barrachd Ball-coise – a-nis aig 5.30f Disathairne
Tòisichidh craoladh de gheamannan SPL a-rithist air Disathairne 14 Lùnastal 2010 le àm craolaidh nas tràithe air an fheasgar, aig 17.30 tron t-sèasan 2010-11. Thèid co-dhiù 38 geamannan a chraoladh “mar beò”.
Agus bidh ball-coise beò againn cuideachd, leis a’ chuairt dheireannaich den Unite Women’s Cup air 14 Samhain 2010, agus le geamannan sa chuairt dheireannaich agus iar-chuairt dheireannaich de Chupan Dùbhlan na h-ALBA.
FilmG
Chaidh FilmG 2010 a chur air bhog aig tachartasan ann an Àird nam Murchan agus Inbhir Nis san Òg-mhìos, agus tha na bùithtean-obrach trèanaidh a-nis gan cur an cois. Ma tha e fa-near dhut film a dhèanamh as t-samhradh am bliadhna, coimhead air www.filmg.co.uk airson chothroman ionnsachaidh a thaobh leasachadh stòiridh, obair air beulaibh a’ chamara agus sgilean eile airson filmeadh aig bùithtean-obrach san Eilean Sgitheanach agus ann an Dùn Dèagh, Eilginn agus Glaschu.
Tha TàlantG cuideachd air a stèidheachadh, airson actairean, sgrìobhadairean, riochdairean agus daoine eile a thoirt còmhla airson film a dhèanamh. Gheibhear a h-uile fios aig www.filmg.co.uk.
Tionndadh gu Didseatach
Tha a’ Ghaidhealtachd a’ dol didseatach san Iuchar. Ceum air cheum tha craoladh telebhisean a’ gluasad bho analog gu didseatach air feadh na Rìoghachd Aonaichte, agus bidh na crainn-chraolaidh air a’ Ghaidhealtachd agus sna h-Eileanan a’ tionndadh am mìos seo.
Tha sgeama cuideachaidh aig Digital UK airson seann daoine agus ciorramaich a tha a’ cur feum air beagan taic le bhith a’ tionndadh gu didseatach. Gheibhear fiosrachadh bho www.helpscheme.co.uk no le bhith a’ cur fòn gu 0800 40 85 900. Gheibhear fiosrachadh eile mun tionndadh aig www.digitaluk.co.uk.
Cuimhnich, chan eil BBC ALBA ri fhaighinn aig an àm seo ach air saideil a-mhàin (Freesat 110 agus Sky 168). Tha sinn ag iomairt airson àite a ghleidheadh airson BBC ALBA air Freeview agus Càbal, agus cumaidh sinn fios ri ar com-pàirtichean mun adhartas againn air seo.
Air cùl a’ chamara ... a’ cur eòlas air Kerry Anne NicLeòid Tha mi 18 a dh’aois, agus is ann à Ceann a-Muigh Chùil air a’ Bhac a tha mi. San t-Sultain mi a’ dol gu Oilthigh Dhùn Èideann airson MA a dhèanamh ann an Ceiltis agus Eòlas Dùthchasach na h-Alba. Ciamar a fhuair thu obair ann an craoladh? Thoisich mi le criomagan beaga airson Radio nan Gaidheal nuair a bha mi sa bhun-sgoil, agus bha e daonnan a’ còrdadh rium. Tha mi dèidheil air dràma agus chòrd e rium a bhith an sàs ann an dealbhan-cluich san sgoil, agus bha mi an sàs san dà fharpais FilmG cuideachd. Bha fios agam bho bha mi glè òg gun robh mi ag iarraidh obair sa ghnìomhachas chraolaidh, agus bha mi air mo dhòigh glan nuair a fhuair mi an obair seo! Dè tha an rud as motha a tha a’ còrdadh riut aig MG ALBA? Is caomh leam an àrainneachd san stiùideo agus tha na daoine uile cho còir. Is e àite-obrach sgoinneil a th’ ann agus bidh mi duilich nuair a dh’fheumas mi falbh airson an Oilthigh. |
 |